આજે આનંદની હેલી

વાહ વાહ રે આજે આનંદની હેલી
નાથને નીરખવા આંખલડી ઘેલી ….. વાહ વાહ રે

પૂર્વ-જનમની પ્રીત જ જાગી
ભવ રે ભવની ભ્રમણા રે ભાંગી
મનડાએ મમતાને મેલી હડસેલી ….. વાહ વાહ રે

મનડું મસ્તાન બની ગુણ એના ગાયે
શ્વાસે શ્વાસે નામ જપી હૈયું હરખાયે
અંતરના ઉદગારો કોણ શકી રોકી ….. વાહ વાહ રે

પ્રીતનાં પાલવડે વાલમ બંધાયો
જન્મો જન્મનો સ્વામી એને જાણ્યો
સાચી રે પ્રેમની વરસે જ્યાં હેલી ….. વાહ વાહ રે

તનનો તંબુરો તુંહી તુંહી બોલે
રોમે રોમે નામ રટી  મસ્ત બની ડોલે
અંત સમયનો સાચો એ બેલી ….. વાહ વાહ રે